Rahat Indori

Rahat Indori is a well-renowned Urdu shayar and lyricist. He was born in 1950 in Indore, Madhya Pradesh and passed away on 11th August 2020. When he was just 10 years old due to financial difficulties he took the job of a “sign painter” He worked hard and completed his MA in Urdu literature from Bhopal and then went on to complete his doctorate(PhD) from Bhuj University of Madhya Pradesh. He had a phenomenal journey from being a painter to a professor. He was extremely popular in mushairas and was treated like a rock star. He never shied away from holding a mirror to governments or people in power.

If you like our podcast please share it with your friends. Leave a review. Feedback is always welcome.

Abdul Raoof Siddiqui
 email: raoof3@yahoo.com
Instagram @urdu.ghazal
Visit our website: www.mstn.in
https://www.buymeacoffee.com/abdulsiddiqui
 
#urdughazal #urdupoetry #rahatindori

Thanks for listening! Follow us on instagram @urdu.ghazal and visit our website www.mstn.in

Transcript

Rahat Indori ka Shaairi sunane ka, ek munfarid andaaz aur makhsoos lehja tha, Jo samaeen ke dilon ko choo leta tha. Mushairon ko kamyaab kar deta tha.

Iqbal Ashhar Sahab, ubke program  “shaairon ke qisse” mein batate hain ki rahat Indori bade Dil chasp our milansaar insaan thay. Woh apne choton ke saat baday shafaqqat se pesh aate thay.

shayad aap ko ye pata na ho ke woh bade acche painter bhi thay. Rahat Sahab ka Bachppan badi tangi mein guzra, kyonki khuddar thay, 10 saal ki umr mein ek “sign painter” ka kaam shuuru kardiya. Kitni mehnat lagi hogi painter se professor banne ke safar mein?

Isiliye Rahat sahab ki shairi aisi hai, jaise koi ache painter ka canvas. Us canvas par

shaairi ke tamaam rang nazar aate hain jaise ke Bulund ahangi, flasafa aur roomaniyat.

log har moḌ pe, ruk ruk ke, sambhalte kyuuñ haiñ 

itnā Darte haiñ, toh phir ghar se, nikalte kyuuñ haiñ 

mai-kada, zarf ke me.aar kā, paimāna hai 

ḳhālī shīshoñ kī tarah, log uchhalte kyuuñ haiñ 

moḌ hotā hai javānī kā, sambhalne ke liye 

aur sab log yahīñ aa ke, phisalte kyuuñ haiñ 

niiñd se merā ta.alluq, hī nahīñ barsoñ se 

ḳhvāb aa aa ke, mirī chhat pe, Tahalte kyuuñ haiñ 

maiñ na jugnū huuñ, diyā huuñ, na koī taarā huuñ 

raushnī vaale, mire naam se, jalte kyuuñ haiñ =====

terī har baat, mohabbat meñ gavārā kar ke 

dil ke bāzār meñ baiThe haiñ, ḳhasāra kar ke 

aate jaate haiñ ka.ī rañg, mire chehre par 

log lete haiñ mazā, zikr tumhārā kar ke 

ek chiñgārī nazar aa.ī thī, bastī meñ use 

vo alag haT gayā, āñdhī ko ishāra kar ke 

āsmānoñ kī taraf, pheñk diyā hai maiñ ne 

chand miTTī ke, charāġhoñ ko sitāra kar ke 

maiñ vo dariyā huuñ, ki har buuñd, bhañvar hai jis kī 

tum ne achchhā hī kiyā, mujh se kināra kar ke 

muntazir huuñ, ki sitāroñ kī zarā aañkh lage 

chāñd ko chhat pur bulā lūñgā, ishāra kar ke ======

ham ne ḳhud apnī, rahnumā.ī kī 

aur shohrat huī, ḳhudā.ī kī 

maiñ ne duniyā se, mujh se duniyā ne 

saikḌoñ baar, bevafā.ī kī 

khule rahte haiñ, saare darvāze 

koī sūrat nahīñ, rihā.ī kī 

TuuT kar ham, mile haiñ pahlī baar 

ye shurūāt hai, judā.ī kī 

so.e rahte haiñ, oḌh kar ḳhud ko 

ab zarūrat nahīñ, razā.ī kī 

manzileñ chūmtī haiñ, mere qadam 

daad diije, shikasta-pā.ī kī 

zindagī jaise-taise, kāTnī hai 

kyā bhalā.ī kī, kyā burā.ī kī 

ishq ke kārobār meñ, ham ne 

jaan de kar, baḌī kamā.ī kī 

ab kisī kī, zabāñ nahīñ khultī 

rasm jaarī hai, muñh-bharā.ī kī 

=============================

bulātī hai magar, jaane kā na.iiñ 

vo duniyā hai, udhar jaane kā na.iiñ

zamīñ rakhnā paḌe, sar par to rakkho 

chalo ho toh, Thahar jaane kā, na.iiñ 

hai duniyā chhoḌnā, manzūr lekin 

vatan ko chhoḌ kar jaane kā, na.iiñ 

janāze hī, janāze haiñ, saḌak par 

abhī māhaul, mar jaane kā na.iiñ 

sitāre noch kar, le jā.ūñgā 

maiñ ḳhālī haath, ghar jaane kā na.iiñ 

mire beTe, kisī se ishq kar 

magar had se guzar jaane kā, na.iiñ 

vo gardan nāptā hai, naap le 

magar zālim se, Dar jaane kā na.iiñ 

saḌak par, arthiyāñ hī arthiyāñ haiñ 

abhī māhaul, mar jaane kā na.iiñ 

vabā phailī huī hai, har taraf 

abhī māhaul, mar jaane kā na.iiñ 

=======

hoñ laakh zulm, magar bad-duā nahīñ deñge 

zamīn maañ hai, zamīñ ko daġhā nahīñ deñge 

hameñ to sirf jagānā hai, sone vāloñ ko 

jo dar khulā hai vahāñ ham, sadā nahīñ deñge 

rivāyatoñ kī safeñ, toḌ kar baḌho varna 

jo tum se aage haiñ, vo rāsta nahīñ deñge

yahāñ kahāñ tirā sajjāda, aa ke ḳhaak pe baiTh 

ki ham faqīr tujhe, boriyā nahīñ deñge 

sharāb pī ke, baḌe tajarbe hue haiñ hameñ 

sharīf logoñ ko, ham mashvara nahīñ deñge 

==========

sabab vo pūchh rahe haiñ, udaas hone kā 

mirā mizāj nahīñ, be-libās hone kā 

nayā bahāna hai, har pal udaas hone kā 

ye fā.eda hai, tire ghar ke paas hone kā 

mahaktī raat ke lamho, nazar rakho mujh par 

bahānā DhūñD rahā huuñ, udaas hone kā 

maiñ tere paas batā, kis ġharaz se aayā huuñ 

subūt de mujhe, chehra-shanās hone kā 

mirī ġhazal se banā, zehn meñ koī tasvīr 

sabab na pūchh mire, devdās hone kā 

kahāñ ho aao, mirī bhūlī-bisrī yaado, aao 

ḳhush-āmdīd hai, mausam udaas hone kā 

ka.ī dinoñ se tabī.at mirī, udaas na thī 

yahī javāz bahut hai, udaas hone kā 

maiñ ahmiyat bhī, samajhtā huuñ, qahqahoñ kī magar 

mazā kuchh apnā alag hai, udaas hone kā 

mire laboñ se, tabassum mazāq karne lagā 

maiñ likh rahā thā qasīda, udaas hone kā 

pata nahīñ, ye parinde kahāñ se aa pahuñche 

abhī zamāna kahāñ thā, udaas hone kā 

maiñ kah rahā huuñ, ki ai dil idhar-udhar na bhaTak 

guzar na jaa.e zamāna, udaas hone kā =======

ajnabī ḳhvāhisheñ, siine meñ dabā bhī na sakūñ 

aise ziddī haiñ parinde, ki uḌā bhī na sakūñ 

phūñk Dālūñgā kisī roz, maiñ dil kī duniyā 

ye tirā ḳhat to nahīñ hai, ki jilā bhī na sakūñ 

mirī ġhairat bhī koī shai hai, ki mahfil meñ mujhe 

us ne is tarah bulāyā hai, ki jā bhī na sakūñ 

phal to sab mere daraḳhtoñ ke, pake haiñ lekin 

itnī kamzor haiñ shāḳheñ, ki hilā bhī na sakūñ 

ik na ik roz kahīñ, DhūñD hī lūñgā tujh ko 

Thokareñ zahr nahīñ haiñ, ki maiñ khā bhī na sakūñ

===========

Aaj ke episode ke akhir mein, Unke kuch sheron pesh kar raha huun jo mukhtaliff ghazlon se Liye  gaye hain. Yeh Mere Pasandeed sher hain

ham apnī jaan ke dushman ko, apnī jaan kahte haiñ 

mohabbat kī isī miTTī ko, hindostān kahte haiñ 

maiñ mar jā.ūñ, to merī ek alag pahchān, likh denā 

lahū se merī peshānī pe, hindostān likh denā 

kitne jañgal haiñ, in makānoñ meñ 

bas yahī, shahr bhar se, pūchhte haiñ 

vo guzartā to hogā ab tanhā 

ek ik rahguzar se pūchhte haiñ

qatra qatra shabnam gin kar kyā hogā 

dariyāoñ kī da.ave-dārī kiyā karo 

bādshāhoñ se bhī pheñke hue sikke na liye 

ham ne ḳhairāt bhī māñgī hai to ḳhuddārī se 

aañkh meñ paanī rakho, hoñToñ pe chiñgārī rakho 

zinda rahnā hai toh tarkībeñ, bahut saarī rakho 

raah ke patthar se baḌh kar kuchh nahīñ haiñ manzileñ 

rāste āvāz dete haiñ safar jaarī rakho 

narm-o-nāzuk, halke-phulke, ruuī jaise, ḳhvāb the 

āñsuoñ meñ bhīgne ke ba.ad, bhārī ho ga.e 

ye zarūrī hai ki, āñkhoñ kā bharam, qaa.em rahe 

niiñd rakkho yā na rakkho, ḳhvāb meyārī rakho 

devtāoñ aur ḳhudāoñ, kī lagā.ī aag ne 

dekhte hī dekhte, bastī ko jañgal kar diyā 

ujāle bāñTne vāloñ, pe kyā guzartī hai 

kisī charāġh kī mānind, jal ke dekhūñgā 

mirī ḳhvāhish hai ki āñgan meñ na dīvār uThe 

mire bhaa.ī mire hisse kī zamīñ tū rakh le 

maiñ parbatoñ se laḌtā rahā, aur chand log 

giilī zamīn khod ke, farhād ho ga.e 

ek hī naddī ke haiñ, ye do kināre dosto 

dostāna zindagī se, maut se yaarī rakho 

ghar ke bāhar, DhūñDhtā rahtā huuñ duniyā 

ghar ke andar, duniyā-dārī rahtī hai 

shāḳhoñ se TuuT jaa.eñ, vo patte nahīñ haiñ ham 

āñdhī se koī kah de, ki auqāt meñ rahe 

na.e kirdār, aate jā rahe haiñ 

magar nāTak, purānā chal rahā hai 

bahut ġhurūr hai, dariyā ko apne hone par 

jo merī pyaas se uljhe, toh dhajjiyāñ uḌ jaa.eñ 

vo chāhtā thā, ki kaasa, ḳharīd le merā 

maiñ us ke taaj kī qīmat lagā ke, lauT aayā 

hamī buniyād kā patthar haiñ lekin 

hameñ ghar se, nikālā jā rahā hai 

janāze par, mire likh denā yaaro 

mohabbat karne vaalā, jā rahā hai

maiñ sochtā huuñ, koī aur kārobār karūñ 

kitāb kaun ḳharīdegā, is girānī meñ =================