Shayar aur Naghma-Nigaar - Qateel Shifai

Qateel Shifai - Shayar aur Naghma-Nigaar

(24th Dec 1919 - 11th July 2001)

He born in British India (now Pakistan). He started working in the Pakistani film industry in 1947 as a lyricist. He wrote 2,500 songs and published multiple books. His talent crossed geographical border. His Urdu poetry has been translated into numerous languages including Hindi,  Gujarati, English, Russian and Chinese. He was honored with multiple awards.

If you like our podcast please share it with your friends. Leave a review. Feedback is always welcome and much appreciated.
Abdul Raoof Siddiqui
email: raoof3@yahoo.com
Instagram @urdu.ghazal
Visit our website: www.mstn.in
https://www.buymeacoffee.com/abdulsiddiqui
#urdughazal
 
 
#urdupoetry #urdughazal #urduadab #Qateelshifai #Mainshayartohnahin #urdupodcasts

Thanks for listening! Follow us on instagram @urdu.ghazal and visit our website www.mstn.in

Transcript

tum pūchho aur maiñ na batā.ūñ aise to hālāt nahīñ 

ek zarā sā dil TuuTā hai aur to koī baat nahīñ 

mere ġhamgīñ hone par ahbāb haiñ yuuñ hairān 'qateel' 

jaise maiñ patthar huuñ mere siine meñ jazbāt nahīñ 

==================

apne hoñToñ par sajānā chāhtā huuñ 

aa tujhe maiñ gungunānā chāhtā huuñ 

koī aañsū tere dāman par girā kar 

buuñd ko motī banānā chāhtā huuñ 

thak gayā maiñ karte karte yaad tujh ko 

ab tujhe maiñ yaad aanā chāhtā huuñ 

chhā rahā hai saarī bastī meñ añdherā 

raushnī ko, ghar jalānā chāhtā huuñ 

āḳhrī hichkī tire zaanū pe aa.e 

maut bhī maiñ shā.irāna chāhtā huuñ 

==========================

tumhārī anjuman se uTh ke dīvāne kahāñ jaate 

jo vābasta hue tum se vo afsāne kahāñ jaate 

nikal kar dair-o-ka.aba se agar miltā na mai-ḳhāna 

to Thukrā.e hue insāñ ḳhudā jaane kahāñ jaate 

tumhārī be-ruḳhī ne laaj rakh lī bāda-ḳhāne kī 

tum āñkhoñ se pilā dete to paimāne kahāñ jaate 

chalo achchhā huā kaam aa ga.ī dīvāngī apnī 

vagarna ham zamāne bhar ko samjhāne kahāñ jaate 

'qateel' apnā muqaddar ġham se begāna agar hotā 

to phir apne parā.e ham se pahchāne kahāñ jaate 

===============

mil kar judā hue to na soyā kareñge ham 

ik dūsre kī yaad meñ royā kareñge ham 

aañsū jhalak jhalak ke satā.eñge raat bhar 

motī palak palak meñ piroyā kareñge ham 

jab dūriyoñ kī aag diloñ ko jalā.egī 

jismoñ ko chāñdnī meñ bhigoyā kareñge ham 

ban kar har ek bazm kā mauzū-e-guftugū 

sheroñ meñ tere ġham ko samoyā kareñge ham 

gar de gayā daġhā hameñ tūfān bhī 'qateel' 

sāhil pe kashtiyoñ ko Duboyā kareñge ham 

=========

vo dil hī kyā tire milne kī jo duā na kare 

maiñ tujh ko bhuul ke zinda rahūñ ḳhudā na kare 

rahegā saath tirā pyaar zindagī ban kar 

ye aur baat mirī zindagī vafā na kare 

ye Thiik hai nahīñ martā koī judā.ī meñ 

ḳhudā kisī ko kisī se magar judā na kare

sunā hai us ko mohabbat duā.eñ detī hai 

jo dil pe choT to khaa.e magar gila na kare 

agar vafā pe bharosa rahe na duniyā ko 

to koī shaḳhs mohabbat kā hausla na kare 

bujhā diyā hai nasīboñ ne mere pyaar kā chāñd 

koī diyā mirī palkoñ pe ab jalā na kare 

zamāna dekh chukā hai parakh chukā hai ise 

'qateel' jaan se jaa.e par iltijā na kare 

==============

haath diyā us ne mire haath meñ 

maiñ to valī ban gayā ik raat meñ 

ishq karoge to kamāoge naam 

tohmateñ baTtī nahīñ ḳhairāt meñ 

ishq burī shai sahī par dosto 

daḳhl na do tum mirī har baat meñ 

mujh pe tavajjoh hai sab āfāt kī 

koī kashish to hai mirī zaat meñ 

shaam kī gul-rañg havā kyā chalī 

dard mahakne lagā jazbāt meñ 

haath meñ kāġhaz kī liye chhatriyāñ 

ghar se na niklā karo barsāt meñ 

rabt baḌhāyā na 'qateel' is liye 

farq thā donoñ ke ḳhayālāt meñ 

============

apne hāthoñ kī lakīroñ meñ sajā le mujh ko 

maiñ huuñ terā tū nasīb apnā banā le mujh ko 

maiñ jo kāñTā huuñ to chal mujh se bachā kar dāman 

maiñ huuñ gar phuul to juuḌe meñ sajā le mujh ko 

tark-e-ulfat kī qasam bhī koī hotī hai qasam 

tū kabhī yaad to kar bhūlne vaale mujh ko 

mujh se tū pūchhne aayā hai vafā ke ma.anī 

ye tirī sāda-dilī maar na Daale mujh ko

kal kī baat aur hai maiñ ab sā rahūñ yā na rahūñ 

jitnā jī chāhe tirā aaj satā le mujh ko 

================

pareshāñ raat saarī hai sitāro tum to so jaao 

sukūt-e-marg taarī hai sitāro tum to so jaao 

hañso aur hañste hañste Dūbte jaao ḳhalāoñ meñ 

hamīñ pe raat bhārī hai sitāro tum to so jaao 

tumheñ kyā aaj bhī koī agar milne nahīñ aayā 

ye baazī ham ne haarī hai sitāro tum to so jaao 

kahe jaate ho ro ro kar hamārā haal duniyā se 

ye kaisī rāzdārī hai sitāro tum to so jaao 

hameñ bhī niiñd aa jā.egī ham bhī so hī jā.eñge 

abhī kuchh be-qarārī hai sitāro tum to so jaao 

=======================

ye mo.ajiza bhī mohabbat kabhī dikhā.e mujhe 

ki sañg tujh pe gire aur zaḳhm aa.e mujhe 

ba-rañg-e-ūd milegī use mirī ḳhushbū 

vo jab bhī chāhe baḌe shauq se jalā.e mujhe 

vahī to sab se ziyāda hai nukta-chīñ merā 

jo muskurā ke hamesha gale lagā.e mujhe 

maiñ apne dil se nikālūñ ḳhayāl kis kis kā 

jo tū nahīñ to koī aur yaad aa.e mujhe 

vo merā dost hai saare jahāñ ko hai ma.alūm 

daġhā kare vo kisī se to sharm aa.e mujhe 

vo mehrbāñ hai to iqrār kyuuñ nahīñ kartā 

vo bad-gumāñ hai to sau baar āzmā.e mujhe 

maiñ apnī zaat meñ nīlām ho rahā huuñ 'qateel' 

ġham-e-hayāt se kah do ḳharīd laa.e mujhe 

=======================

kiyā hai pyaar jise ham ne zindagī kī tarah 

vo āshnā bhī milā ham se ajnabī kī tarah 

kise ḳhabar thī baḌhegī kuchh aur tārīkī 

chhupegā vo kisī badlī meñ chāñdnī kī tarah 

baḌhā ke pyaas mirī us ne haath chhoḌ diyā 

vo kar rahā thā muravvat bhī dil-lagī kī tarah 

sitam to ye hai ki vo bhī na ban sakā apnā 

qubūl ham ne kiye jis ke ġham ḳhushī kī tarah 

kabhī na sochā thā ham ne 'qateel' us ke liye 

karegā ham pe sitam vo bhī har kisī kī tarah 

===============

hālāt ke qadmoñ pe qalandar nahīñ girtā 

TuuTe bhī jo taarā to zamīñ par nahīñ girtā 

girte haiñ samundar meñ baḌe shauq se dariyā 

lekin kisī dariyā meñ samundar nahīñ girtā 

samjho vahāñ phaldār shajar koī nahīñ hai 

vo sahn ki jis meñ koī patthar nahīñ girtā 

itnā to huā fā.eda bārish kī kamī kā 

is shahr meñ ab koī phisal kar nahīñ girtā 

in.aam ke lālach meñ likhe mad.h kisī kī 

itnā to kabhī koī suḳhan-var nahīñ girtā 

hairāñ hai ka.ī roz se Thahrā huā paanī 

tālāb meñ ab kyuuñ koī kañkar nahīñ girtā 

us banda-e-ḳhuddār pe nabiyoñ kā hai saaya 

jo bhuuk meñ bhī luqma-e-tar par nahīñ girtā 

=================================

husn ko chāñd javānī ko kañval kahte haiñ 

un kī sūrat nazar aa.e to ġhazal kahte haiñ 

uf vo marmar se tarāshā huā shaffāf badan 

dekhne vaale use tāj-mahal kahte haiñ 

===============

khulā hai jhuuT kā bāzār aao sach boleñ 

na ho balā se ḳharīdār aao sach boleñ 

sukūt chhāyā hai insāniyat kī qadroñ par 

yahī hai mauqa-e-iz.hār aao sach boleñ 

hameñ gavāh banāyā hai vaqt ne apnā 

ba-nām-e-azmat-e-kirdār aao sach boleñ 

sunā hai vaqt kā hākim baḌā hī munsif hai 

pukār kar sar-e-darbār aao sach boleñ 

jo vasf ham meñ nahīñ kyuuñ kareñ kisī meñ talāsh 

agar zamīr hai bedār aao sach boleñ 

chhupā.e se kahīñ chhupte haiñ daaġh chehre ke 

nazar hai ā.ina-bardār aao sach boleñ 

'qateel' jin pe sadā pattharoñ ko pyaar aayā 

kidhar ga.e vo gunahgār aao sach boleñ 

======================================

marhala raat kā jab aa.egā 

jism saa.e ko taras jā.egā 

e'tibār us kā hamesha karnā 

vo to jhūTī bhī qasam khā.egā 

tū na hogī to phir ai shām-e-firāq 

kaun aa kar hameñ bahalā.egā 

ham use yaad bahut ā.eñge 

jab use bhī koī Thukrā.egā 

kā.enāt us kī mirī zaat meñ hai 

mujh ko kho kar vo kise pā.egā 

na rahe jab vo bhale din bhī 'qateel' 

ye zamāna bhī guzar jā.egā 

===================

us adā se bhī huuñ maiñ āshnā tujhe itnā jis pe ġhurūr hai 

maiñ jiyūñgā tere baġhair bhī mujhe zindagī kā sha.ūr hai 

na havas mujhe mai-e-nāb kī na talab sabā-o-sahāb kī 

tirī chashm-e-nāz kī ḳhair ho mujhe be-piye hī surūr hai 

jo samajh liyā tujhe bā-vafā to phir is meñ terī bhī kyā ḳhatā 

ye ḳhalal hai mere dimāġh kā ye mirī nazar kā qusūr hai 

============

raqs karne kā milā hukm jo dariyāoñ meñ 

ham ne ḳhush ho ke bhañvar bāñdh liye paañv meñ 

un ko bhī hai kisī bhīge hue manzar kī talāsh 

buuñd tak bhī na bo sake jo kabhī sahrāoñ meñ 

jo bhī aatā hai batātā hai nayā koī ilaaj 

baT na jaa.e tirā bīmār masīhāoñ meñ 

hausla kis meñ hai yūsuf kī ḳharīdārī kā 

ab to mahñgā.ī ke charche haiñ zuleḳhāoñ meñ 

jis barahman ne kahā hai ki ye saal achchhā hai 

us ko dafnāo mire haath kī rekhāoñ meñ 

vo ḳhudā hai kisī TuuTe hue dil meñ hogā 

masjidoñ meñ use DhūñDo na kalīsāoñ meñ 

ham ko aapas meñ mohabbat nahīñ karne dete 

ik yahī aib hai is shahr ke dānāoñ meñ 

mujh se karte haiñ 'qateel' is liye kuchh log hasad 

kyuuñ mire sher haiñ maqbūl hasīnāoñ meñ 

============================

yaaro kahāñ tak aur mohabbat nibhā.ūñ maiñ 

do mujh ko bad-duā ki use bhuul jā.ūñ maiñ 

suntā huuñ ab kisī se vafā kar rahā hai vo 

ai zindagī ḳhushī se kahīñ mar na jā.ūñ maiñ 

us jaisā naam rakh ke agar aa.e maut bhī 

hañs kar use 'qateel' gale se lagā.ūñ maiñ 

Mohe aayi na jag se laaj
 Main itna zor se nachi aaj
 Ke ghungharu tut gaye
 Ke ghungroo tut gaye

Kuch mujhpe naya joban bhi tha
 Kuch pyar ka pagal pan bhi tha
 Ek palak meri teer bani
 Ek zulf meri zanjeer bani
 Liya dil sajan ka jeet
 Wo chhede payaliya ke geet
 Ke ghungroo tut gaye
 Ke ghungroo tut gaye
 Mohe aayi na jag se laaj
 Main itna zor se nachi aaj
 Ke ghungroo tut gaye

Main basi thi jiske sapno mein
 Wo milega ab mujhe apno mein
 Kehti hai meri har angadayi
 Main piya ki neend chura layi
 Main ban ke gayi thi chor
 Ke meri payal thi kamzor
 Ke ghungroo tut gaye
 Mohe aayi na jag se laaj
 Main itna zor se nachi aaj
 Ke ghungroo tut gaye