Ahmad Faraz - Legend of Urdu Adab

Syed Ahmad Shah better known by his pen name Ahmed Faraz, (January 1931 – 25 August 2008) was a Pakistani Urdu poet, scriptwriter and chairman of Pakistan Academy of Letters. He wrote his poetry under pseudonym Faraz. During his lifetime, he criticized military rule and coup d'état in the country and was displaced by the military dictators. He was awarded the Sitara-i-Imtiaz and Hilal-e-Imtiaz. On 25 August 2008, he died in Islamabad, and later Government of Pakistan conferred Hilal-e-Pakistan posthumously upon Faraz for his contribution to poetry and Urdu literature. (Source: Wikipedia)

If you like our podcast please share it with your friends. Leave a review. Feedback is always welcome and much appreciated.
Abdul Raoof Siddiqui
email: raoof3@yahoo.com
Instagram @urdu.ghazal
Visit our website: www.mstn.in
https://www.buymeacoffee.com/abdulsiddiqui
#urdughazal #ahmadfaraz

Thanks for listening! Follow us on instagram @urdu.ghazal and visit our website www.mstn.in

Transcript

Aur 'farāz' chāhiyeñ kitnī mohabbateñ tujhe,

maaoñ ne tere naam par bachchoñ kā naam rakh diyā.

Doston main bade adab se, Faraz sahab ki

Ek Ghazal ke 2 sher se shuru karta hoon. 

Tawajjo chahunga…

===========================================================

Wohi ishq jo tha kabhi junoon ussay roz-gaar bana diya,

Kahin zakhm bech k aa gaye kahin sher koi suna diya.

Kabhi qissa Tere Visaal Ka Jo kisi se kahna na chahiye

Kabhi Daagh Tere Firaaq Ka Sare-Anjuman Hi dikha Diya

=========================================

karūñ na yaad, magar kis tarah bhulā.ūñ usay

Ghazal bahāna karūñ aur gungunā.ūñ use 

ye log tazkire karte haiñ apne logoñ ke 

maiñ kaise baat karūñ, ab kahāñ se lā.ūñ usay 

vahī jo daulat-e-dil hai, vahī jo rāhat-e-jāñ 

tumhārī baat pe ai nāseho, gañvā.ūñ use 

========================================

Sunā hai log use aañkh bhar ke dekhte haiñ 

so us ke shahr meiñ, kuchh din Thahar ke dekhte haiñ.

Sunā hai rabt hai us ko ḳharāb-hāloñ se 

so apne aap ko, barbād kar ke dekhte haiñ 

sunā hai dard kī gāhak hai chashm-e-nāz us kī 

so ham bhī us kī galī se, guzar ke dekhte haiñ 

sunā hai us ko bhī hai sher-o-shā.irī se shaġhaf 
so ham bhī mo.ajize apne, hunar ke dekhte haiñ 

sunā hai bole to bātoñ se phuul jhaḌte haiñ 

ye baat hai toh chalo, baat kar ke dekhte haiñ 

sunā hai raat usay chāñd taktā rahtā hai 

sitāre bām-e-falak se, utar ke dekhte haiñ 

sunā hai din ko usay titliyāñ satātī haiñ 

sunā hai raat ko jugnū, Thahar ke dekhte haiñ 

sunā hai hashr haiñ us kī ġhazāl sī āñkheñ 

sunā hai us ko hiran, dasht bhar ke dekhte haiñ 

sunā hai us kī siyah-chashmagī qayāmat hai 

so us ko surma-farosh aah bhar ke dekhte haiñ 

sunā hai us ke laboñ se gulāb jalte haiñ 

so ham bahār pe ilzām, dhar ke dekhte haiñ 

sunā hai aa.ina tamsāl hai jabīñ us kī 

jo saada dil haiñ usay, ban-sañvar ke dekhte haiñ 

sunā hai us ke badan kī tarāsh aisī hai 

ki phuul apnī qabā.eñ, katar ke dekhte haiñ 

bas ik nigāh se luTtā hai qāfila dil kā 

so rah-ravān-e-tamannā bhī, Dar ke dekhte haiñ 

sunā hai us ke shabistāñ se muttasil hai bahisht 

makīñ udhar ke bhī, jalve idhar ke dekhte haiñ 

ruke to gardisheñ us kā tavāf kartī haiñ 

chale to us ko zamāne, Thahar ke dekhte haiñ 

kisay naseeb ke be-pairahan use dekhe 

kabhī kabhī dar o dīvār, ghar ke dekhte haiñ 

kahāniyāñ hī sahī, sab mubālġhe hī sahī 

agar Ye ḳhvāb hai, tābīr kar ke dekhte haiñ 

ab us ke shahr meñ Thahreñ ki kuuch kar jaa.eñ 

'farāz' aao sitāre safar ke dekhte haiñ 

==============================================

ranjish hī sahī dil hī dukhāne ke liye aa 

aa phir se mujhe, chhoḌ ke jaane ke liye aa 

kuchh to mire pindār-e-mohabbat kā bharam rakh 

tū bhī to kabhī, mujh ko manāne ke liye aa 

pahle se marāsim na sahī phir bhī kabhī toh

rasm-o-rah-e-duniyā hī nibhāne ke liye aa 

kis kis ko batā.eñge judā.ī kā sabab ham 

tū mujh se ḳhafā hai toh zamāne ke liye aa 

ik umr se huuñ lazzat-e-girya se bhī mahrūm 

ai rāhat-e-jāñ mujh ko rulāne ke liye aa 

ab tak dil-e-ḳhush-fahm ko, tujh se haiñ ummīdeñ 

ye āḳhirī sham.eñ bhī, bujhāne ke liye aa 

==========================================

silsile toḌ gayā vo sabhī jaate jaate 

varna itne to marāsim the, ki aate jaate 

shikva-e-zulmat-e-shab se to kahīñ behtar thā 

apne hisse kī koī sham.a jalāte jaate 

kitnā āsāñ thā tire hijr meiñ marnā jānāñ 

phir bhī ik umr lagī, jaan se jaate jaate 

jashn-e-maqtal hī na barpā huā varna ham bhī 

pā-ba-jaulāñ hī sahī, nāchte gaate jaate 

Us kī vo jaane usay pās-e-vafā thā ki na thā 

tum 'farāz' apnī taraf se, to nibhāte jaate 

silsile toḌ gayā vo sabhī jaate jaate 

varna itne to marāsim the, ki aate jaate

==========================================

us ne sukūt-e-shab meiñ bhī apnā payām rakh diyā 

hijr kī raat baam par, māh-e-tamām rakh diyā 

āmad-e-dost kī naved kū-e-vafā meiñ aam thī 

maiñ ne bhī ik charāġh sā, dil sar-e-shām rakh diyā 

shiddat-e-tishnagī meñ bhī, ġhairat-e-mai-kashī rahī 

us ne jo pher lī nazar, maiñ ne bhī jaam rakh diyā 

us ne nazar nazar meiñ hī, aise bhale suḳhan kahe 

maiñ ne to us ke paañv meiñ, saarā kalām rakh diyā 

dekho ye mere ḳhvāb thay, dekho ye mere zaḳhm haiñ 

maiñ ne to sab hisāb-e-jāñ bar-sar-e-ām rakh diyā 

ab ke bahār ne bhī kiiñ, aisī sharārteñ ki bas 

kab-ke-darī kī chaal meiñ, terā ḳhirām rakh diyā 

aur 'farāz' chāhiyeñ kitnī mohabbateñ tujhe 

maaoñ ne tere naam par bachchoñ kā naam rakh diyā 

===============================

dukh fasāna nahīñ ki tujh se kaheñ 

dil bhī maanā nahīñ, ki tujh se kaheñ 

aaj tak apnī bekalī kā sabab 

ḳhud bhī jaanā nahīñ, ki tujh se kaheñ 

ek tū harf-e-āshnā thā magar 

ab zamāna nahīñ ki tujh se kaheñ 

Favorite

ai ḳhudā dard-e-dil hai baḳhshish-e-dost 

āb-o-dāna nahīñ ki tujh se kaheñ 

ab to apnā bhī us galī meñ 'farāz' 

aanā jaanā nahīñ, ki tujh se kaheñ 

============================================

Gurez - Avoidance, Duur Rehna

jaan se ishq aur jahāñ se gurez 

dostoñ ne kiyā, kahāñ se gurez 

ibtidā kī tere qasīde se 

ab ye mushkil karūñ, kahāñ se gurez 

maiñ Wahāñ huuñ, jahāñ jahāñ tum ho 

tum karoge kahāñ kahāñ se gurez 

kar gayā mere tere qisse meiñ 

dāstāñ-go Yahāñ Wahāñ se gurez 

==========================

muntazir kab se tahayyur hai tirī taqrīr kā 

baat kar tujh par, gumāñ hone lagā tasvīr kā 

raat kyā so.e ki baaqī umr kī niiñd uḌ ga.ī 

ḳhvāb kyā dekhā, ki dhaḌkā lag gayā tābīr kā 

kaise paayā thā tujhe, phir kis tarah khoyā tujhe 

mujh sā munkir bhī to, qaa.el ho gayā taqdīr kā 

jis tarah bādal kā saaya pyaas bhaḌkātā rahe 

maiñ ne ye aalam bhī dekhā hai tirī tasvīr kā 

jis ko bhī chāhā use shiddat se chāhā hai 'farāz' 

silsila TuuTā nahīñ hai dard kī zanjīr kā 

============================

Zindagi yuan thi ki jeenay ka bahana tu tha

Hum faqat zebe-hikayat thay, fasana tu tha

Yaar Aghyaar ke hathon mein kamanen thi faraz

Aur Hum dekh rahe the, ke Nishaana tu Tha

======

Is Nazm ko main un nafrat angez, awaazon ki nazar karta huun, jinka khayaam zyada din tak is dunia mein nahin rahega….Tawajjo Chahunga

Nazm ka unwaan hai - Mat qatl karo aawazon ko

tum apne aqīdoñ ke neze 

har dil meñ utāre jaate ho 

ham log mohabbat vaale haiñ 

tum ḳhanjar kyuuñ lahrāte ho 

is shahr meiñ naġhme bahne do 

bastī meñ hameñ bhī rahne do 

ham pālanhār haiñ phūloñ ke 

ham ḳhushbū ke rakhvāle haiñ 

tum kis kā lahū piine aa.e 

ham pyaar sikhāne vaale haiñ 

is shahr meñ phir kyā dekhoge 

jab harf yahāñ mar jā.egā 

jab teġh pe lai kaT jā.egī 

jab sher safar kar jā.egā 

jab qatl huā sur sāzoñ kā 

jab kaal paḌā āvāzoñ kā 

jab shahr khañDar ban jā.egā 

phir kis par sañg uThāoge 

apne chehre ā.īnoñ meiñ 

jab dekhoge Dar jāoge 

==================

bhale dinoñ kī baat hai 

bhalī sī ek shakl thī 

na ye ki husn-e-tām ho 

na dekhne meñ aam sī 

na ye ki vo chale to kahkashāñ sī rahguzar lage 

magar vo saath ho to phir bhalā bhalā safar lage 

koī bhī rut ho us kī chhab 

fazā kā rañg-rūp thī 

vo garmiyoñ kī chhāñv thī 

vo sardiyoñ kī dhuup thī 

na muddatoñ judā rahe 

na saath sub.h-o-shām ho 

na rishta-e-vafā pe zid 

na ye ki izn-e-ām ho 

na aisī ḳhush-libāsiyāñ 

ki sādgī gila kare 

na itnī be-takallufī 

ki aa.ina hayā kare 

na iḳhtilāt meñ vo ram 

ki bad-maza hoñ ḳhvāhisheñ 

na is qadar supurdagī 

ki zach kareñ navāzisheñ 

na āshiqī junūn kī 

ki zindagī azaab ho 

na is qadar kaThor-pan 

ki dostī ḳharāb ho 

kabhī to baat bhī ḳhafī 

kabhī sukūt bhī suḳhan 

kabhī to kisht-e-za.afarāñ 

kabhī udāsiyoñ kā ban 

sunā hai ek umr hai 

muāmalāt-e-dil kī bhī 

visāl-e-jāñ-fazā,n to kyā 

firāq-e-jāñgusil kī bhī 

so ek roz kyā huā 

vafā pe bahas chhiḌ ga.ī 

maiñ ishq ko amar kahūñ 

vo merī zid se chiḌ ga.ī 

maiñ ishq kā asiir thā 

vo ishq ko qafas kahe 

ki umr bhar ke saath ko 

vo bad-tar-az-havas kahe 

shajar hajar nahīñ ki ham 

hamesha pā-ba-gil raheñ 

na Dor haiñ ki rassiyāñ 

gale meñ mustaqil raheñ 

mohabbatoñ kī vus.ateñ 

hamāre dast-o-pā meñ haiñ 

bas ek dar se nisbateñ 

sagān-e-bā-vafā meñ haiñ 

maiñ koī panting nahīñ 

ki ik frame meñ rahūñ 

vahī jo man kā miit ho 

usī ke prem meñ rahūñ 

tumhārī soch jo bhī ho 

maiñ us mizāj kī nahīñ 

mujhe vafā se bair hai 

ye baat aaj kī nahīñ 

na us ko mujh pe maan thā 

na mujh ko us pe zo.am hī 

jo ahd hī koī na ho 

to kyā ġham-e-shikastagī 

so apnā apnā rāsta 

hañsī-ḳhushī badal diyā 

vo apnī raah chal paḌī 

maiñ apnī raah chal diyā 

bhalī sī ek shakl thī 

bhalī sī us kī dostī 

ab us kī yaad raat din 

nahīñ, magar kabhī kabhī