Shakeel Badayuni

Shakeel Badayuni (3 August 1916 – 20 April 1970) was a famous Indian Urdu poet & lyricist. He is best remembered for most of his songs with music director Naushad. Shakiil won three Filmfare Awards in a row from 1961 to 1963 for his songs 'Kahin Deep Jale Kahin Dil' (Bees Saal Baad), 'Husnwale Tera Jawab Nahin' (Gharana), and 'Chaudvin Ka Chand Ho' (Chaudhvin Ka Chand).

kabhī yak-ba-yak tavajjoh kabhī daf.atan taġhāful,
mujhe aazmā rahā hai koī ruḳh badal badal kar.

Abdul Raoof Siddiqui
email: raoof3@yahoo.com

Thanks for listening! Follow us on instagram @urdu.ghazal and visit our website www.mstn.in

Transcript

ġham-e-āshiqī se kah do, rah-e-ām tak na pahuñche 

mujhe ḳhauf hai ye tohmat, tire naam tak na pahuñche 

maiñ nazar se pī rahā thā, to ye dil ne bad-duā dī 

tirā haath zindagī bhar, kabhī jaam tak na pahuñche 

vo navā-e-muzmahil kyā, na ho jis meñ dil kī dhaḌkan 

vo sadā-e-ahl-e-dil kyā, jo avaam tak na pahuñche 

na.ī sub.h par nazar hai, magar aah ye bhī Dar hai 

ye sahar bhī rafta rafta, kahīñ shaam tak na pahuñche 

ye adā-e-bay-niyāzī, tujhe bevafā mubārak 

magar aisī be-ruḳhī kyā, ki salām tak na pahuñche 

jo naqāb-e-ruḳh uThā dī, to ye qaid bhī lagā dī 

uThe har nigāh lekin, koī baam tak na pahuñche 

unheñ apne dil kī ḳhabreñ, mire dil se mil rahī haiñ 

maiñ jo un se ruuTh jā.ūñ, to payām tak na pahuñche 

vahī ik ḳhamosh naġhma hai ‘shakīl', jān-e-hastī 

jo zabān par na aa.e, jo kalām tak na pahuñche 

=======

mere ham-nafas, mere ham-navā, mujhe dost ban ke daġhā na de 

maiñ huuñ dard-e-ishq se jāñ-ba-lab, mujhe zindagī kī duā na de 

mere dāġh-e-dil se hai raushnī isī raushnī se hai zindagī 

mujhe Dar hai ai mire chāra-ga,r ye charāġh tū hī bujhā na de 

mujhe chhoḌ de mire haal par, tirā kyā bharosa hai, chāra-gar 

ye tirī navāzish-e-muḳhtasar, mirā dard aur baḌhā na de 

merā azm itnā buland hai, kay parā.e sho.aloñ kā Dar nahīñ 

mujhe ḳhauf ātish-e-gul se hai, ye kahīñ chaman ko jalā na de 

vo uThe haiñ le ke ḳhum-o-subū, aray o ‘shakīl', kahāñ hai tū 

tirā jaam lene ko bazm meñ, koī aur haath baḌhā na de 

=========

āḳhirī vaqt hai, āḳhirī saañs hai, zindagī kī hai shaam āḳhirī āḳhirī 

sañg-dil aa bhī jā ab ḳhudā ke liye, lab pe hai terā naam, āḳhirī āḳhirī 

kuchh to āsān hogā adam kā safar, un se kahnā tumheñ DhūñDhtī hai nazar 

nāma-bar tū ḳhudārā na ab der kar, de de un ko payām, āḳhirī āḳhirī 

tauba kartā huuñ kal se piyūñgā nahīñ, mai-kashī ke sahāre jiyūñgā nahīñ 

merī tauba se pahle magar sāqiyā sirf de ek jaam, āḳhirī āḳhirī 

mujh ko yāroñ ne nahlā ke kafnā diyā, do ghaḌī bhī na biitī ki dafnā diyā 

kaun kartā hai ġham, TūTte hī ye dam kar diyā intizām, āḳhirī āḳhirī 

jīte-jī qadr merī kisī ne na kī, zindagī bhī mirī, bevafā ho ga.ī 

duniyā vaalo mubārak ye duniyā tumheñ, kar chale ham salām, āḳhirī āḳhirī 

========

ai ishq ye sab duniyā vaale, be-kār kī bāteñ karte haiñ 

paa.el ke ġhamoñ kā ilm nahīñ, jhankār kī bāteñ karte haiñ 

har dil meñ chhupā hai tiir, koī har paañv meñ hai zanjīr koī 

pūchhe koī in se ġham ke maze, jo pyaar kī bāteñ karte haiñ 

ulfat ke na.e dīvānoñ ko, kis tarah se koī samjhā.e 

nazroñ pe lagī hai pābandī, dīdār kī bāteñ karte haiñ 

bhañvre haiñ agar mad.hosh to kyā, parvāne bhī haiñ ḳhāmosh to kyā 

sab pyaar ke naġhme gaate haiñ, sab yaar kī bāteñ karte haiñ

===========

kaise kah duuñ, kī mulāqāt nahīñ hotī hai 

roz milte haiñ, magar baat nahīñ hotī hai 

aap lillāh, na dekhā kareñ ā.īna kabhī 

dil kā aa jaanā, baḌī baat nahīñ hotī hai 

chhup ke rotā huuñ tirī yaad meñ, duniyā bhar se 

kab mirī aañkh se, barsāt nahīñ hotī hai 

hāl-e-dil pūchhne vaale, tirī duniyā meñ kabhī 

din to hotā hai magar, raat nahīñ hotī hai 

jab bhī milte haiñ to kahte haiñ, kay kaise ho 'shakīl' 

is se aage to koī baat, nahīñ hotī hai 

========

ab to ḳhushī kā ġham hai, na ġham kī ḳhushī mujhe 

be-his banā chukī hai bahut, zindagī mujhe 

vo vaqt bhī, ḳhudā na dikhā.e kabhī mujhe 

un kī nadāmatoñ pe ho, sharmindagī mujhe 

rone pe apne un ko bhī, afsurda dekh kar 

yuuñ ban rahā huuñ, jaise ab aa.ī hañsī mujhe 

yuuñ dījiye fareb-e-mohabbat kay, umr bhar 

maiñ zindagī ko yaad karūñ, zindagī mujhe 

paayā hai sab ne dil magar, is dil ke bāvajūd 

ik shai milī hai dil meñ, khaTaktī huī mujhe 

raazī hoñ yā ḳhafā hoñ, vo jo kuchh bhī hoñ 'shakīl' 

har haal meñ qubūl hai, un kī ḳhushī mujhe 

======

ġham-e-ishq rah gayā hai, ġham-e-justujū meñ Dhal kar 

vo nazar se chhup ga.e haiñ, mirī zindagī badal kar 

terī guftugū ko nāseh, dil-e-ġham-zadā se jal kar 

abhī tak to sun rahā thā, magar ab sambhal sambhal kar 

na milā surāġh-e-manzil, kabhī umr bhar kisī ko 

nazar aa ga.ī hai manzil, kabhī do qadam hī chal kar 

ġham-e-umr-e-muḳhtasar se, abhī be-ḳhabar haiñ kaliyāñ 

na chaman meñ pheñk denā, kisī phuul ko masal kar 

haiñ kisī ke muntazir ham, magar ai umīd-e-mub.ham 

kahīñ vaqt rah na jaa.e, yūñhī karvaTeñ badal kar 

mirī tez-gāmiyoñ se, nahīñ barq ko bhī nisbat 

kahīñ kho na jaa.e duniyā, mire saath saath chal kar 

kabhī yak-ba-yak tavajjoh, kabhī daf.atan taġhāful 

mujhe aazmā rahā hai, koī ruḳh badal badal kar 

haiñ 'shakīl' zindagī meñ, ye jo vus.ateñ numāyāñ 

inhīñ vus.atoñ se paidā, koī ālam-e-ġhazal kar 

=============