Sarmad Sahbai

Poet, Playwright, Director Sarmad Sahbai is one of the most prominent poets of Pakistan.

  Abdul Raoof Siddiqui
  email: raoof3@yahoo.com
  Instagram @urdu.ghazal
  Visit our website: www.mstn.in

 #urdupoetry #sarmadshabai

Thanks for listening! Follow us on instagram @urdu.ghazal and visit our website www.mstn.in

Transcript

dasht meñ hai ek naqsh-e-rahguzar, sab se alag 

ham meñ hai shāyad koī mahv-e-safar, sab se alag 

chalte chalte vo bhī āḳhir bhiiḌ meñ gum ho gayā 

vo jo har sūrat meñ aatā thā nazar, sab se alag 

sab kī apnī manzileñ thiiñ, sab ke apne rāste 

ek āvāra phire ham dar-ba-dar, sab se alag 

hai rah-o-rasm-e-zamāna parda-e-be-gāngī 

darmiyāñ rahtā huuñ maiñ sab ke magar, sab se alag 

de ke aadat rañj kī, hotā hai mujh par mehrbāñ 

us sitamgar ne ye sīkhā hai hunar, sab se alag 

shahr-e-kasrat meñ, ajab ik rauzan-e-ḳhalvat khulā 

us ne jo dekhā mujhe, ik lamha bhar sab se alag 

Sab ke sab shāmil huāy 'sarmad' julūs-e-ām meñ 

muñh uThā.e chal diyā hai tū kidhar, sab se alag 

Banaati hai nazar tasveer-e-aab Aahista aahista

Kay hai phir tashnagi Mahv-e-saraab Aahista aahista

Akayli shaam yun galiyon makaanon se guzarti hai

Phire Seenay mein jaise izteraab Aahista aahista

Shab-e-tanha na jaane main kisay awaaz deta huun

Na jaanay kaun deta hai jawaab Aahista aahista

Teray hotay huay Duniya ka hum ko gham na tha lekin

Hua phir ek yeh hum bay-hisaab Aahista aahista

Teri khidki pe tujhko dekhnay jab raat rukti hai

Guzarta hai gali se mahtaab Aahista aahista

Khumaar-e-lams tha dhalta gaya umron ki masti mein

Hui yeh be-karaan mauj-e-sharaab Aahista aahista

Humen marnay ki khwahish aur woh marnay nahin deta

Ajab zaalim hai deta hai azaab Aahista aahista

Udaata hai mujhe raqsh-e-junoon dosh-e-qayamat par

Ke-par-ke tez-tar hai hum-riqaab Aahista aahista

Kise thii fursat-e-hijraan kisay yun ishq laa-haq thaa

Hua hai haal is dil ka kharaab Aahista aahista

Kisikay partav-e-dedaar se rangee_n hui chilman

Palak bunti rahee yeh taar-e-khwaab Aahista aahista

Kahan hum aur kahaan ye aalam-e-sehray-bayaa_n sarmad

Koi padta hai is dil ki kitaab Aahista aahista

be-dilī meñ bhī dil baḌā rakhnā 

ye darīcha sadā khulā rakhnā 

raat ke sehr meñ hai saarā nagar 

apne ghar kā diyā jalā rakhnā 

ye ghaḌī sabr-āzmā hogī 

zinda rahne kā hausla rakhnā 

saarī ḳhushiyāñ vafā nahīñ kartīñ 

dard se dil ko āshnā rakhnā 

bhuul kar bhī na dil pe mail aa.e 

aa.ina ye sadā dhulā rakhnā 

sīñch kar ḳhuuñ se ek ik lamha 

peḌ patjhaḌ meñ bhī harā rakhnā 

phal kabhī to khilā.egī ye havā 

apnī niyyat kā aasrā rakhnā 

marne kā pata de mire jiine kā pata de 

ai be-ḳhabarī kuchh mire hone kā pata de 

ik dūsre kī āhaToñ pe chalte haiñ sab log 

hai koī yahāñ jo mujhe raste kā pata de 

ḳhud aap se bichhḌā huuñ maiñ is andhe safar meñ 

ai tīrgi-e-shab mire saa.e kā pata de 

is aas pe har ā.īne ko joḌ rahā huuñ 

shāyad koī reza mire chehre kā pata de 

guzrī hai mirī umr sarāboñ ke safar meñ 

ai reg-e-ravāñ ab kisī chashme kā pata de 

har pal kisī aahaT pe mire kaan lage haiñ 

jaise abhī koī tire aane kā pata de 

bikhrā huā huuñ sadiyoñ kī be-ant tahoñ meñ 

mujh ko koī kho.e hue lamhe kā pata de 

dahlīz dilāsā hai na dīvār amaañ hai 

ai dar-badrī mere Thikāne kā pata de 

huuñ qaid hisār-e-rag-e-girdāb meñ 'sarmad' 

koī nahīñ jo mujh ko kināre kā pata de 

har safar ke ba.ad vaisā hī safar rakkhā gayā 

aur phir maqsūm merā dar-ba-dar rakkhā gayā 

arsa-e-dasht-e-talab ko intihā baḳhshī ga.ī 

mohlat-e-umr-e-ravāñ ko muḳhtasar rakkhā gayā 

ham kahāñ siine kī tah meñ ye samundar thāmte 

ek us ḳhātir tujhe ai chashm-e-tar rakkhā gayā 

bosa-e-ḳhurshīd se kholā sahar kā pairahan 

zānū-e-shab par mah-e-kāmil kā sar rakkhā gayā 

din ke rastoñ par bichā.ī nā-rasā.ī kī thakan 

niiñd kī dahlīz par ḳhvāboñ kā par rakkhā gayā 

muztarib rahtī hai koh-o-dasht meñ jaise havā 

is tarah siine meñ sāñsoñ kā guzar rakkhā gayā 

āte-jāte har-nafas meñ maut kā thā zā.iqa 

rā.egāñ jiine meñ marne kā hunar rakkhā gayā 

ḳhvāhisheñ jāgeñ jamāl-e-yār ke dīdār se 

pāniyoñ par māh-e-uryāñ kā asar rakkhā gayā 

umr bhar 'sarmad' thī jis ko yaad rakhne kī sazā 

sāmnā us shoḳh se ik lamha bhar rakkhā gayā 

=========