Moin Ahsan Jazbi

Moin Ahsan Jazbi was one of the important Urdu poets of the Progressive Writers Movement. He was born on 21st Aug 1912 in Mubarakpur, Uttar Pradesh and died on 13th Feb 2005 in Aligarh, Uttar Pradesh, India. Jazbi stayed true to the classical literary tradition and embellished it with contemporary style. He completed M.A. in Urdu and joined the Urdu department of Aligarh Muslim University as Urdu faculty member. His thesis entitled “Hali ka Siyaasi Shuoor” earned him his degree of Ph. D.  

Abdul Raoof Siddiqui
 email: raoof3@yahoo.com
 Instagram @urdu.ghazal
 Visit our website: www.mstn.in

#urdupoetry #moinahsanjazbi

Thanks for listening! Follow us on instagram @urdu.ghazal and visit our website www.mstn.in

Transcript

Nazm

apnī soī huī duniyā ko jagā luuñ to chalūñ 

apne ġham-ḳhāne meñ ik dhuum machā luuñ to chalūñ 

aur ik jām-e-mai-e-talḳh chaḌhā luuñ to chalūñ 

abhī chaltā huuñ zarā ḳhud ko sambhālūñ to chalūñ 

jaane kab pī thī abhī tak hai mai-e-ġham kā ḳhumār 

dhundlā dhundlā nazar aatā hai jahān-e-bedār 

āñdhiyāñ chaltī haiñ duniyā huī jaatī hai ġhubār 

aañkh to mal luuñ zarā hosh meñ aa luuñ to chalūñ 

vo mirā sehr vo ejaaz kahāñ hai laanā 

merī khoī huī āvāz kahāñ hai laanā 

mirā TuuTā huā vo saaz kahāñ hai laanā 

ik zarā giit bhī is saaz pe gā luuñ to chalūñ 

maiñ thakā haarā thā itne meñ jo aa.e bādal 

kisī matvāle ne chupke se baḌhā dī botal 

uf vo rañgīn pur-asrār ḳhayāloñ ke mahal 

aise do chaar mahal aur banā luuñ to chalūñ 

mujh se kuchh kahne ko aa.ī hai mire dil kī jalan 

kyā kiyā maiñ ne zamāne meñ nahīñ jis kā chalan 

āñsūo tum ne to bekār bhigoyā dāman 

apne bhīge hue dāman ko sukhā luuñ to chalūñ 

merī āñkhoñ meñ abhī tak hai mohabbat kā ġhurūr 

mere hoñToñ ko abhī tak hai sadāqat kā ġhurūr 

mere māthe pe abhī tak hai sharāfat kā ġhurūr 

aise vahmoñ se zarā ḳhud ko nikālūñ to chalūñ 

=============

Ghazal

marne kī duā.eñ kyuuñ māñgūñ, jiine kī tamannā kaun kare 

ye duniyā ho yā vo duniyā, ab ḳhvāhish-e-duniyā kaun kare 

jab kashtī sābit-o-sālim thī, sāhil kī tamannā kis ko thī 

ab aisī shikasta kashtī par, sāhil kī tamannā kaun kare 

jo aag lagā.ī thī tum ne, us ko to bujhāyā ashkoñ ne 

jo ashkoñ ne bhaḌkā.ī hai, us aag ko ThanDā kaun kare 

duniyā ne hameñ chhoḌā ‘jazbī', ham chhoḌ na deñ kyuuñ duniyā ko 

duniyā ko samajh kar baiThe haiñ, ab duniyā duniyā kaun kare 

========

jab kabhī kisī gul par ik zarā nikhār aayā 

kam-nigāh ye samjhe mausam-e-bahār aayā 

us ufuq ko kyā kahiye nuur bhī dhuñdlakā bhī 

bār-hā kiran phūTī bār-hā ġhubār aayā 

ham ne ġham ke māroñ kī mahfileñ bhī dekhīñ haiñ 

ek ġham-gusār uThā ek ġham-gusār aayā 

ārzū-e-sāhil se ham kinārā kyā karte 

jis taraf qadam uThe bahar-e-be-kanār aayā 

yuuñ to saikḌoñ ġham the par ġham-e-jahāñ 'jazbī' 

ba.ad ek muddat ke dil ko sāzgār aayā 

=====

dāġh-e-ġham dil se kisī tarah miTāyā na gayā 

maiñ ne chāhā bhī magar tum ko bhulāyā na gayā 

umr bhar yuuñ to zamāne ke masā.ib jhele 

terī nazroñ kā magar baar uThāyā na gayā 

rūThne vāloñ se itnā koī jā kar pūchhe 

ḳhud hī rūThe rahe yā ham se manāyā na gayā 

us ne is tarah mohabbat kī nigāheñ Dālīñ 

ham se duniyā kā koī raaz chhupāyā na gayā 

thī haqīqat meñ vahī manzil-e-maqsad 'jazbī' 

jis jagah tujh se qadam aage baḌhāyā na gayā

=================

mile mujh ko ġham se fursat to sunā.ūñ vo fasāna 

ki Tapak paḌe nazar se mai-e-ishrat-e-shabāna 

yahī zindagī musībat yahī zindagī musarrat 

yahī zindagī haqīqat yahī zindagī fasāna 

kabhī dard kī tamannā kabhī koshish-e-mudāvā 

kabhī bijliyoñ kī ḳhvāhish kabhī fikr-e-āshiyāna 

mire qahqahoñ kī zad par kabhī gardisheñ jahāñ kī 

mire āñsuoñ kī rau meñ kabhī talḳhī-e-zamāna 

kabhī maiñ huuñ tujh se nālāñ kabhī mujh se tū pareshāñ 

kabhī maiñ tirā hadaf huuñ kabhī tū mirā nishāna 

jise pā sakā na zāhid jise chhū sakā na suufī 

vahī taar chheḌtā hai mirā soz-e-shā.irāna 

=========

aish se kyuuñ ḳhush hue kyuuñ ġham se ghabrāyā kiye 

zindagī kyā jaane kyā thī aur kyā samjhā kiye 

nāla-e-be-tāb lab tak aate aate rah gayā 

jaane kyā sharmīlī nazroñ se vo farmāyā kiye 

ishq kī ma.asūmiyoñ kā ye bhī ik andāz thā 

ham nigāh-e-lutf-e-jānāñ se bhī sharmāyā kiye 

vo havā.eñ vo ghaTā.eñ vo fazā vo us kī yaad 

ham bhī mizrāb-e-alam se sāz-e-dil chheḌā kiye 

muḳhtasar ye hai hamārī dāstān-e-zindagī 

ik sukūn-e-dil kī ḳhātir umr bhar taḌpā kiye 

kaaT dī yuuñ ham ne 'jazbī' rāh-e-manzil kaaT dī 

gir paḌe har gaam par har gaam par sambhlā kiye