Naseer Turabi

Naseer Turabi
1945 - 2021

A famous Urdu poet & lyricist from Pakistan. He completed his M.A. in Mass Communications from Karachi University, Pakistan. His poetry book “Aks-e-Faryadi” was published in 2000.

Abdul Raoof Siddiqui
email: raoof3@yahoo.com
Instagram @urdu.ghazal
Visit our website: www.mstn.in
 
#urdupoetry #naseerturabi

Thanks for listening! Follow us on instagram @urdu.ghazal and visit our website www.mstn.in

Transcript

vo ham-safar thā, magar us se ham-navā.ī na thī 

ki dhuup chhāñv kā aalam rahā, judā.ī na thī 

na apnā rañj, na auroñ kā dukh, na terā malāl 

shab-e-firāq, kabhī ham ne yuuñ, gañvā.ī na thī 

mohabbatoñ kā safar, is tarah bhī guzrā thā 

shikasta-dil the musāfir, shikasta-pā.ī na thī 

adāvateñ thīñ, taġhāful thaa, ranjisheñ thiiñ bahut 

bichhaḌne vaale meñ sab kuchh thaa, bevafā.ī na thī 

bichhaḌte vaqt, un āñkhoñ meñ thī, hamārī ġhazal 

ġhazal bhī vo, jo kisī ko abhī, sunā.ī na thī 

kise pukār rahā thā, vo Dūbtā huā din 

sadā to aa.ī thī, lekin, koī duhā.ī na thī 

kabhī ye haal ki, donoñ meñ, yak-dilī thī bahut 

kabhī ye marhala, jaise, ki āshnā.ī na thī 

ajiib hotī hai, rāh-e-suḳhan bhī dekh 'nasīr' 

vahāñ bhī aa ga.e āḳhir, jahāñ rasā.ī na thī ========

diyā sā dil ke ḳharābe meñ, jal rahā hai miyāñ 

diye ke gird koī aks, chal rahā hai miyāñ 

ye ruuh raqs-e-charāġhāñ hai, apne halqe meñ 

ye jism saaya hai, aur saaya Dhal rahā miyāñ 

ye aañkh parda hai, ik gardish-e-tahayyur kā 

ye dil nahīñ hai, bagūla uchhal rahā hai miyāñ 

kabhī kisī kā guzarnā, kabhī Thahar jaanā 

mire sukūt meñ, kyā kyā ḳhalal rahā hai miyāñ

kisī kī raah meñ aflāk, zer-e-pā hote 

yahāñ to paañv se sahrā, nikal rahā hai miyāñ 

hujūm-e-shoḳh meñ, ye dil hī be-ġharaz niklā 

chalo koī to harīfāna, chal rahā hai miyāñ

tujhe abhī se paḌī hai, ki faisla ho jaa.e 

na jaane kab se yahāñ, vaqt Tal rahā hai miyāñ 

tabī.atoñ hī, ke milne se thā, maza baaqī 

so vo maza bhī kahāñ, āj-kal rahā hai, miyāñ 

ġhamoñ kī fasl meñ, jis ġham ko rā.egāñ samjheñ 

ḳhushī to ye hai, ki vo ġham bhī, phal rahā hai miyāñ 

likhā 'naseer' ne, har rañg meñ, safed-o-siyāh 

magar jo harf, lahū meñ machal rahā hai miyāñ 

====================================

milne kī tarah mujh se vo, pal bhar nahīñ miltā 

dil us se milā, jis se, muqaddar nahīñ miltā 

ye rāh-e-tamannā hai, yahāñ dekh ke chalnā 

is raah meñ sar milte haiñ, patthar nahīñ miltā 

ham-rañgī-e-mausam ke, talabgār na hote 

saaya bhī to qāmat ke, barābar nahīñ miltā 

kahne ko ġham-e-hijr, baḌā dushman-e-jāñ hai 

par dost bhī, is dost se, behtar nahīñ miltā 

kuchh roz 'nasīr' aao, chalo ghar meñ rahā jaa.e 

logoñ ko ye shikva hai, ki ghar par nahīñ miltā 

=============

tujhe kyā ḳhabar, mire be-ḳhabar, mirā silsila koī aur hai 

jo mujhī ko mujh se baham kare, vo gurez-pā koī aur hai 

mire mausamoñ ke bhī taur the, mire barg-o-bār hī aur the 

magar ab ravish hai alag koī, magar ab havā, koī aur hai 

yahī shahr, shahr-e-qarār hai to dil-e-shikasta kī ḳhair ho 

mirī aas hai kisī aur se, mujhe pūchhtā, koī aur hai 

ye vo mājrā-e-firāq hai, jo mohabbatoñ, se na khul sakā 

ki mohabbatoñ hī ke darmiyāñ, sabab-e-jafā, koī aur hai 

haiñ mohabbatoñ kī amānateñ, yahī hijrateñ, yahī qurbateñ 

diye bām-o-dar kisī aur ne, to rahā basā, koī aur hai 

ye fazā ke rañg khule khule, isī pesh-o-pas ke haiñ silsile 

abhī ḳhush-navā koī aur thā, abhī par-kushā koī aur hai 

dil-e-zūd-ranj na kar gila, kisī garm o sard raqīb kā 

ruḳh-e-nā-sazā to hai rū-ba-rū, pas-e-nā-sazā koī aur hai 

bahut aa.e hamdam o chāra-gar, jo numūd-o-nām ke ho ga.e 

jo zavāl-e-ġham, kā bhī ġham kare, vo ḳhush-āshnā koī aur hai 

ye ‘naseer' shām-e-supurdagī kī, udaas udaas sī, raushnī 

ba-kanār-e-gul zarā dekhnā, ye tumhī ho yā koī aur hai 

================

is kaḌī dhuup meñ, saaya kar ke 

tū kahāñ hai, mujhe tanhā kar ke 

maiñ to arzāñ thā, ḳhudā kī mānind 

kaun guzrā, mirā saudā kar ke 

tīrgī TuuT paḌī hai mujh par 

maiñ pashīmāñ huuñ, ujālā kar ke

le gayā chhīn ke āñkheñ merī 

mujh se kyuuñ vāda-e-fardā kar ke 

lau irādoñ kī baḌhā dī shab ne 

din gayā jab mujhe, paspā kar ke 

kaash ye, ā.īna-e-hijr-o-visāl 

TuuT jaa.e, mujhe andhā kar ke 

har taraf, sach kī duhā.ī hai 'naseer' 

sher likhte raho, sachchā kar ke